ശ്രീ ഗുരു ഗീതാ പഞ്ചകം

॥ ശ്രീഗുരുഗീതാ ലഘു॥

॥ ശ്രീഗുരുഗീതാ ॥

॥ ശ്രീ ഗുരുപാദുകാ പഞ്ചകം ॥

ഓം നമോ ഗുരുഭ്യോ ഗുരുപാദുകാഭ്യോ നമഃ പരേഭ്യഃ പരപാദുകാഭ്യഃ ।

ആചാര്യ സിദ്ധേശ്വര പാദുകാഭ്യോ നമോ നമഃ ശ്രീ ഗുരുപാദുകാഭ്യഃ ॥

ഐങ്കാര ഹ്രീങ്കാര രഹസ്യ യുക്ത

ശ്രീങ്കാര ഗൂഢാർഥമഹാവിഭൂത്യാ ॥ 1 ॥

ഓങ്കാര മർമ പ്രതിപാദിനീഭ്യാം

നമോ നമഃ ശ്രീ ഗുരുപാദുകാഭ്യാം ॥ 2 ॥

ഹോത്രാഗ്നി ഹൗത്രാഗ്നി ഹവിഷ്യഹോത്ര

ഹോമാദി സർവാകൃതി ഭാസമാനാം ।

യദ് ബ്രഹ്മ തദ്ബോധ വിതാരിണീഭ്യാം

നമോ നമഃ ശ്രീ ഗുരുപാദുകാഭ്യാം ॥ 3 ॥

കാമാദി സർപവ്രജ ഗാരുഡാഭ്യാം

വിവേക വൈരാഗ്യ നിധി പ്രദാഭ്യാം ।

ബോധ പ്രദാഭ്യാം ദൃതമോക്ഷദാഭ്യാം

നമോ നമഃ ശ്രീ ഗുരുപാദുകാഭ്യാം ॥ 4 ॥

അനന്ത സംസാര സമുദ്ര താര

നൗകായിതാഭ്യാം സ്ഥിരഭക്തിദാഭ്യാം ।

ജാഡ്യാബ്ധി സംശോഷണ വാഡവാഭ്യാം

നമോ നമഃ ശ്രീ ഗുരുപാദുകാഭ്യാം ॥ 5 ॥

॥ ഓം ശാന്തിഃ ശാന്തിഃ ശാന്തിഃ ॥

॥ അഥ ശ്രീ ഗുരുഗീതാ പ്രാരംഭഃ ॥

ശ്രീഗണേശായ നമഃ । ശ്രീസരസ്വത്യൈ നമഃ । ശ്രീഗുരുഭ്യോ നമഃ ।

॥ ഓം ॥

അസ്യ ശ്രീ ഗുരുഗീതാ സ്തോത്രമന്ത്രസ്യ ।

ഭഗവാൻ സദാശിവ ഋഷിഃ ।

നാനാവിധാനി ഛന്ദാംസി ।

ശ്രീ ഗുരുപരമാത്മാ ദേവതാ ।

ഹം ബീജം । സഃ ശക്തിഃ । ക്രോം കീലകം ।

ശ്രീ ഗുരുപ്രസാദസിദ്ധ്യർഥേ ജപേ വിനിയോഗഃ ॥

॥ അഥ ധ്യാനം ॥

ഹംസാഭ്യാം പരിവൃത്തപത്രകമലൈർദിവ്യൈർജഗത്കാരണൈർ –

വിശ്വോത്കീർണമനേകദേഹനിലയൈഃ സ്വച്ഛന്ദമാത്മേച്ഛയാ ।

തദ്ദ്യോതം പദശാംഭവം തു ചരണം ദീപാങ്കുരഗ്രാഹിണം

പ്രത്യക്ഷാക്ഷരവിഗ്രഹം ഗുരുപദം ധ്യായേദ്വിഭും ശാശ്വതം ॥

മമ ചതുർവിധപുരുഷാർഥസിദ്ധ്യർഥേ ജപേ വിനിയോഗഃ ।

॥ അഥ ശ്രീഗുരുഗീതാ ॥

സൂത ഉവാച –

കൈലാസ ശിഖരേ രമ്യേ ഭക്തിസന്ധാനനായകം ।

പ്രണമ്യ പാർവതീ ഭക്ത്യാ ശങ്കരം പര്യപൃച്ഛത ॥ 1 ॥

ശ്രീ ദേവ്യുവാച –

ഓം നമോ ദേവദേവേശ പരാത്പരജഗദ്ഗുരോ ।

സദാശിവ മഹാദേവ ഗുരുദീക്ഷാം പ്രദേഹി മേ ॥ 2 ॥

കേന മാർഗേണ ഭോ സ്വാമിൻ ദേഹി ബ്രഹ്മമയോ ഭവേത് ।

ത്വം കൃപാം കുരു മേ സ്വാമിൻ നമാമി ചരണൗ തവ ॥ 3 ॥

ഈശ്വര ഉവാച –

മമരൂപാസി ദേവി ത്വം ത്വത്പ്രീത്യർഥം വദാമ്യഹം ।

ലോകോപകാരകഃ പ്രശ്നോ ന കേനാപി കൃതഃ പുരാ ॥ 4 ॥

ദുർലഭം ത്രിഷു ലോകേഷു തച്ഛൃണുഷ്വ വദാമ്യഹം ।

ഗുരും വിനാ ബ്രഹ്മ നാന്യത്സത്യം സത്യം വരാനനേ ॥ 5 ॥

വേദശാസ്ത്രപുരാണാനി ഇതിഹാസാദികാനി ച ।

മന്ത്രയന്ത്രാദിവിദ്യാശ്ച സ്മൃതിരുച്ചാടനാദികം ॥ 6 ॥

ശൈവശാക്താഗമാദീനി അന്യാനി വിവിധാനി ച ।

അപഭ്രംശകരാണീഹ ജീവാനാം ഭ്രാന്തചേതസാം ॥ 7 ॥

യജ്ഞോ വ്രതം തപോ ദാനം ജപസ്തീർഥം തഥൈവ ച ।

ഗുരുതത്ത്വമവിജ്ഞായ മൂഢാസ്തേ ചരതേ ജനാഃ ॥ 8 ॥

ഗുരുർബുദ്ധ്യാത്മനോ നാന്യത് സത്യം സത്യം ന സംശയഃ ।

തല്ലാഭാർഥം പ്രയത്നസ്തു കർതവ്യോ ഹി മനീഷിഭിഃ ॥ 9 ॥

ഗൂഢ വിദ്യാ ജഗന്മായാ ദേഹേ ചാജ്ഞാനസംഭവാ ।

ഉദയോ യത്പ്രകാശേന ഗുരുശബ്ദേന കഥ്യതേ ॥ 10 ॥

സർവപാപവിശുദ്ധാത്മാ ശ്രീഗുരോഃ പാദസേവനാത് ।

ദേഹീ ബ്രഹ്മ ഭവേദ്യസ്മാത്ത്വത്കൃപാർഥം വദാമി തേ ॥ 11 ॥

ഗുരുപാദാംബുജം സ്മൃത്വാ ജലം ശിരസി ധാരയേത് ।

സർവതീർഥാവഗാഹസ്യ സമ്പ്രാപ്നോതി ഫലം നരഃ ॥ 12 ॥

ശോഷണം പാപപങ്കസ്യ ദീപനം ജ്ഞാനതേജസാം ।

ഗുരുപാദോദകം സമ്യക് സംസാരാർണവതാരകം ॥ 13 ॥

അജ്ഞാനമൂലഹരണം ജന്മ കർമ നിവാരണം ।

ജ്ഞാനവൈരാഗ്യസിദ്ധ്യർഥം ഗുരുപാദോദകം പിബേത് ॥ 14 ॥

ഗുരോഃ പാദോദകം പീത്വാ ഗുരോരുച്ഛിഷ്ടഭോജനം ।

ഗുരുമൂർതേഃ സദാ ധ്യാനം ഗുരുമന്ത്രം സദാ ജപേത് ॥ 15 ॥

കാശീ ക്ഷേത്രം തന്നിവാസോ ജാഹ്നവീ ചരണോദകം ।

ഗുരുർവിശ്വേശ്വരഃ സാക്ഷാത് താരകം ബ്രഹ്മ നിശ്ചിതം ॥ 16 ॥

ഗുരോഃ പാദോദകം യത്തു ഗയാഽസൗ സോഽക്ഷയോ വടഃ ।

തീർഥരാജഃ പ്രയാഗശ്ച ഗുരുമൂർത്യൈ നമോ നമഃ ॥ 17 ॥

ഗുരുമൂർതിം സ്മരേന്നിത്യം ഗുരുനാമ സദാ ജപേത് ।

ഗുരോരാജ്ഞാം പ്രകുർവീത ഗുരോരന്യന്ന ഭാവയേത് ॥ 18 ॥

ഗുരുവക്ത്രസ്ഥിതം ബ്രഹ്മ പ്രാപ്യതേ തത്പ്രസാദതഃ ।

ഗുരോർധ്യാനം സദാ കുര്യാത്കുലസ്ത്രീ സ്വപതേര്യഥാ ॥ 19 ॥

സ്വാശ്രമം ച സ്വജാതിം ച സ്വകീർതിപുഷ്ടിവർധനം ।

ഏതത്സർവം പരിത്യജ്യ ഗുരോരന്യന്ന ഭാവയേത് ॥ 20 ॥

അനന്യാശ്ചിന്തയന്തോ മാം സുലഭം പരമം പദം ।

തസ്മാത് സർവപ്രയത്നേന ഗുരോരാരാധനം കുരു ॥ 21 ॥

ത്രൈലോക്യേ സ്ഫുടവക്താരോ ദേവാദ്യസുരപന്നഗാഃ ।

ഗുരുവക്ത്രസ്ഥിതാ വിദ്യാ ഗുരുഭക്ത്യാ തു ലഭ്യതേ ॥ 22 ॥

ഗുകാരസ്ത്വന്ധകാരശ്ച രുകാരസ്തേജ ഉച്യതേ ।

അജ്ഞാനഗ്രാസകം ബ്രഹ്മ ഗുരുരേവ ന സംശയഃ ॥ 23 ॥

ഗുകാരഃ പ്രഥമോ വർണോ മായാദിഗുണഭാസകഃ ।

രുകാരോ ദ്വിതീയോ ബ്രഹ്മ മായാ ഭ്രാന്തി വിനാശനം ॥ 24 ॥

ഏവം ഗുരുപദം ശ്രേഷ്ഠം ദേവാനാമപി ദുർലഭം ।

ഹാഹാ ഹൂഹൂ ഗണൈശ്ചൈവ ഗന്ധർവൈശ്ച പ്രപൂജ്യതേ ॥ 25 ॥

ധ്രുവം തേഷാം ച സർവേഷാം നാസ്തി തത്ത്വം ഗുരോഃ പരം ।

ആസനം ശയനം വസ്ത്രം ഭൂഷണം വാഹനാദികം ॥ 26 ॥

സാധകേന പ്രദാതവ്യം ഗുരുസന്തോഷകാരകം ।

ഗുരോരാരാധനം കാര്യം സ്വജീവിത്വം നിവേദയേത് ॥ 27 ॥

കർമണാ മനസാ വാചാ നിത്യമാരാധയേദ്ഗുരും ।

ദീർഘദണ്ഡം നമസ്കൃത്യ നിർലജ്ജോ ഗുരുസന്നിധൗ ॥ 28 ॥

ശരീരമിന്ദ്രിയം പ്രാണാം സദ്ഗുരുഭ്യോ നിവേദയേത് ।

ആത്മദാരാദികം സർവം സദ്ഗുരുഭ്യോ നിവേദയേത് ॥ 29 ॥

കൃമികീടഭസ്മവിഷ്ഠാ ദുർഗന്ധിമലമൂത്രകം ।

ശ്ലേഷ്മരക്തം ത്വചാ മാംസം വഞ്ചയേന്ന വരാനനേ ॥ 30 ॥

സംസാരവൃക്ഷമാരൂഢാഃ പതന്തോ നരകാർണവേ ।

യേന ചൈവോദ്ധൃതാഃ സർവേ തസ്മൈ ശ്രീഗുരവേ നമഃ ॥ 31 ॥

ഗുരുർബ്രഹ്മാ ഗുരുർവിഷ്ണുർഗുരുർദേവോ മഹേശ്വരഃ ।

ഗുരുരേവ പരബ്രഹ്മ തസ്മൈ ശ്രീഗുരവേ നമഃ ॥ 32 ॥

ഹേതവേ ജഗതാമേവ സംസാരാർണവസേതവേ ।

പ്രഭവേ സർവവിദ്യാനാം ശംഭവേ ഗുരവേ നമഃ ॥ 33 ॥

അജ്ഞാനതിമിരാന്ധസ്യ ജ്ഞാനാഞ്ജനശലാകയാ ।

ചക്ഷുരുന്മീലിതം യേന തസ്മൈ ശ്രീഗുരവേ നമഃ ॥ 34 ॥

ത്വം പിതാ ത്വം ച മേ മാതാ ത്വം ബന്ധുസ്ത്വം ച ദേവതാ ।

സംസാരപ്രതിബോധാർഥം തസ്മൈ ശ്രീഗുരവേ നമഃ ॥ 35 ॥

യത്സത്യേന ജഗത്സത്യം യത്പ്രകാശേന ഭാതി തത് ।

യദാനന്ദേന നന്ദന്തി തസ്മൈ ശ്രീഗുരവേ നമഃ ॥ 36 ॥

യസ്യ സ്ഥിത്യാ സത്യമിദം യദ്ഭാതി ഭാനുരൂപതഃ ।

പ്രിയം പുത്രദി യത്പ്രീത്യാ തസ്മൈ ശ്രീഗുരവേ നമഃ ॥ 37 ॥

യേന ചേതയതേ ഹീദം ചിത്തം ചേതയതേ ന യം ।

ജാഗ്രത്സ്വപ്നസുഷുപ്ത്യാദി തസ്മൈ ശ്രീഗുരവേ നമഃ ॥ 38 ॥

യസ്യ ജ്ഞാനാദിദം വിശ്വം ന ദൃശ്യം ഭിന്നഭേദതഃ ।

സദേകരൂപരൂപായ തസ്മൈ ശ്രീഗുരവേ നമഃ ॥ 39 ॥

യസ്യാമതം തസ്യ മതം മതം യസ്യ ന വേദ സഃ ।

അനന്യഭാവ ഭാവായ തസ്മൈ ശ്രീഗുരവേ നമഃ ॥ 40 ॥

യസ്യ കാരണരൂപസ്യ കാര്യരൂപേണ ഭാതി യത് ।

കാര്യകാരണരൂപായ തസ്മൈ ശ്രീഗുരവേ നമഃ ॥ 41 ॥

നാനാരൂപമിദം സർവം ന കേനാപ്യസ്തി ഭിന്നതാ ।

കാര്യകാരണതാ ചൈവ തസ്മൈ ശ്രീഗുരവേ നമഃ ॥ 42 ॥

യദംഘ്രികമലദ്വന്ദ്വം ദ്വന്ദ്വതാപനിവാരകം ।

താരകം സർവദാഽപദ്ഭ്യഃ ശ്രീഗുരും പ്രണമാമ്യഹം ॥ 43 ॥

ശിവേ ക്രുദ്ധേ ഗുരുസ്ത്രാതാ ഗുരൗ ക്രുദ്ധേ ശിവോ ന ഹി ।

തസ്മാത് സർവപ്രയത്നേന ശ്രീഗുരും ശരണം വ്രജേത് ॥ 44 ॥

വന്ദേ ഗുരുപദദ്വന്ദ്വം വാങ്മനശ്ചിത്തഗോചരം

ശ്വേതരക്തപ്രഭാഭിന്നം ശിവശക്ത്യാത്മകം പരം ॥ 45 ॥

ഗുകാരം ച ഗുണാതീതം രുകാരം രൂപവർജിതം ।

ഗുണാതീതസ്വരൂപം ച യോ ദദ്യാത്സ ഗുരുഃ സ്മൃതഃ ॥ 46 ॥

അത്രിനേത്രഃ സർവസാക്ഷീ അചതുർബാഹുരച്യുതഃ ।

അചതുർവദനോ ബ്രഹ്മാ ശ്രീഗുരുഃ കഥിതഃ പ്രിയേ ॥ 47 ॥

അയം മയാഞ്ജലിർബദ്ധോ ദയാ സാഗരവൃദ്ധയേ ।

യദനുഗ്രഹതോ ജന്തുശ്ചിത്രസംസാരമുക്തിഭാക് ॥ 48 ॥

ശ്രീഗുരോഃ പരമം രൂപം വിവേകചക്ഷുഷോഽമൃതം ।

മന്ദഭാഗ്യാ ന പശ്യന്തി അന്ധാഃ സൂര്യോദയം യഥാ ॥ 49 ॥

ശ്രീനാഥചരണദ്വന്ദ്വം യസ്യാം ദിശി വിരാജതേ ।

തസ്യൈ ദിശേ നമസ്കുര്യാദ് ഭക്ത്യാ പ്രതിദിനം പ്രിയേ ॥ 50 ॥

തസ്യൈ ദിശേ സതതമഞ്ജലിരേഷ ആര്യേ

പ്രക്ഷിപ്യതേ മുഖരിതോ മധുപൈർബുധൈശ്ച ।

ജാഗർതി യത്ര ഭഗവാൻഗുരുചക്രവർതീ

വിശ്വോദയ പ്രലയനാടകനിത്യസാക്ഷീ ॥ 51 ॥

ശ്രീനാഥാദി ഗുരുത്രയം ഗണപതിം പീഠത്രയം ഭൈരവം

സിദ്ധൗഘം ബടുകത്രയം പദയുഗം ദൂതീക്രമം മണ്ഡലം ।

വീരാന്ദ്വ്യഷ്ടചതുഷ്ക ഷഷ്ടി നവകം വീരാവലീ പഞ്ചകം

ശ്രീമന്മാലിനിമന്ത്രരാജസഹിതം വന്ദേ ഗുരോർമണ്ഡലം ॥ 52 ॥

അഭ്യസ്തൈഃ സകലൈഃ സുദീർഘമനിലൈർവ്യാധിപ്രദൈർദുഷ്കരൈഃ

പ്രാണായാമശതൈരനേകകരണൈർദുഃഖാത്മകൈർദുർജയൈഃ ।

യസ്മിന്നഭ്യുദിതേ വിനശ്യതി ബലീ വായുഃ സ്വയം തത്ക്ഷണാത്

പ്രാപ്തും തത്സഹജം സ്വഭാവമനിശം സേവധ്വമേകം ഗുരും ॥ 53 ॥

സ്വദേശികസ്യൈവ ശരീരചിന്തനം

ഭവേദനന്തസ്യ ശിവസ്യ ചിന്തനം ।

സ്വദേശികസ്യൈവ ച നാമകീർതനം

ഭവേദനന്തസ്യ ശിവസ്യ കീർതനം ॥ 54 ॥

യത്പാദരേണുകണികാ കാപി സംസാരവാരിധേഃ ।

സേതുബന്ധായതേ നാഥം ദേശികം തമുപാസ്മഹേ ॥ 55 ॥

യസ്മാദനുഗ്രഹം ലബ്ധ്വാ മഹദജ്ഞാനമുത്സൃജേത് ।

തസ്മൈ ശ്രീദേശികേന്ദ്രായ നമശ്ചാഭീഷ്ടസിദ്ധയേ ॥ 56 ॥

പാദാബ്ജം സർവസംസാരദാവാനലവിനാശകം ।

ബ്രഹ്മരന്ധ്രേ സിതാംഭോജമധ്യസ്ഥം ചന്ദ്രമണ്ഡലേ ॥ 57 ॥

അകഥാദിത്രിരേഖാബ്ജേ സഹസ്രദലമണ്ഡലേ ।

ഹംസപാർശ്വത്രികോണേ ച സ്മരേത്തന്മധ്യഗം ഗുരും ॥ 58 ॥

സകലഭുവനസൃഷ്ടിഃ കൽപിതാശേഷപുഷ്ടിഃ

നിഖിലനിഗമദൃഷ്ടിഃ സമ്പദാം വ്യർഥദൃഷ്ടിഃ ।

അവഗുണപരിമാർഷ്ടിസ്തത്പദാർഥൈകദൃഷ്ടിഃ

ഭവ ഗുണപരമേഷ്ടിർമോക്ഷമാർഗൈകദൃഷ്ടിഃ ॥ 59 ॥

സകലഭുവനരംഗസ്ഥാപനാ സ്തംഭയഷ്ടിഃ

സകരുണരസവൃഷ്ടിസ്തത്ത്വമാലാസമഷ്ടിഃ ।

സകലസമയസൃഷ്ടിഃ സച്ചിദാനന്ദദൃഷ്ടിർ-

നിവസതു മയി നിത്യം ശ്രീഗുരോർദിവ്യദൃഷ്ടിഃ ॥ 60 ॥

അഗ്നിശുദ്ധസമം താത ജ്വാലാ പരിചകാധിയാ ।

മന്ത്രരാജമിമം മന്യേഽഹർനിശം പാതു മൃത്യുതഃ ॥ 61 ॥

തദേജതി തന്നൈജതി തദ്ദൂരേ തത്സമീപകേ ।

തദന്തരസ്യ സർവസ്യ തദു സർവസ്യ ബാഹ്യതഃ ॥ 62 ॥

അജോഽഹമജരോഽഹം ച അനാദിനിധനഃ സ്വയം ।

അവികാരശ്ചിദാനന്ദ അണീയാന്മഹതോ മഹാൻ ॥ 63 ॥

അപൂർവാണാം പരം നിത്യം സ്വയഞ്ജ്യോതിർനിരാമയം ।

വിരജം പരമാകാശം ധ്രുവമാനന്ദമവ്യയം ॥ 64 ॥

ശ്രുതിഃ പ്രത്യക്ഷമൈതിഹ്യമനുമാനശ്ചതുഷ്ടയം ।

യസ്യ ചാത്മതപോ വേദ ദേശികം ച സദാ സ്മരേത് ॥ 65 ॥

മനുഞ്ച യദ്ഭവം കാര്യം തദ്വദാമി മഹാമതേ ।

സാധുത്വം ച മയാ ദൃഷ്ട്വാ ത്വയി തിഷ്ഠതി സാമ്പ്രതം ॥ 66 ॥

അഖണ്ഡമണ്ഡലാകാരം വ്യാപ്തം യേന ചരാചരം ।

തത്പദം ദർശിതം യേന തസ്മൈ ശ്രീഗുരവേ നമഃ ॥ 67 ॥

സർവശ്രുതിശിരോരത്നവിരാജിതപദാംബുജഃ ।

വേദാന്താംബുജസൂര്യോ യസ്തസ്മൈ ശ്രീഗുരവേ നമഃ ॥ 68 ॥

യസ്യ സ്മരണമാത്രേണ ജ്ഞാനമുത്പദ്യതേ സ്വയം ।

യ ഏവ സർവ സമ്പ്രാപ്തിസ്തസ്മൈ ശ്രീഗുരവേ നമഃ ॥ 69 ॥

ചൈതന്യം ശാശ്വതം ശാന്തം വ്യോമാതീതം നിരഞ്ജനം ।

നാദബിന്ദുകലാതീതം തസ്മൈ ശ്രീഗുരവേ നമഃ ॥ 70 ॥

സ്ഥാവരം ജംഗമം ചൈവ തഥാ ചൈവ ചരാചരം ।

വ്യാപ്തം യേന ജഗത്സർവം തസ്മൈ ശ്രീഗുരവേ നമഃ ॥ 71 ॥

ജ്ഞാനശക്തിസമാരൂഢസ്തത്ത്വമാലാ വിഭൂഷിതഃ ।

ഭുക്തിമുക്തിപ്രദാതാ യസ്തസ്മൈ ശ്രീഗുരവേ നമഃ ॥ 72 ॥

അനേകജന്മസമ്പ്രാപ്തസർവകർമവിദാഹിനേ ।

സ്വാത്മജ്ഞാനപ്രഭാവേണ തസ്മൈ ശ്രീഗുരവേ നമഃ ॥ 73 ॥

ന ഗുരോരധികം തത്ത്വം ന ഗുരോരധികം തപഃ ।

തത്ത്വം ജ്ഞാനാത്പരം നാസ്തി തസ്മൈ ശ്രീഗുരവേ നമഃ ॥ 74 ॥

മന്നാഥഃ ശ്രീജഗന്നാഥോ മദ്ഗുരുസ്ത്രിജഗദ്ഗുരുഃ ।

മമാത്മാ സർവഭൂതാത്മാ തസ്മൈ ശ്രീഗുരവേ നമഃ ॥ 75 ॥

ധ്യാനമൂലം ഗുരോർമൂർതിഃ പൂജാമൂലം ഗുരോഃ പദം ।

മന്ത്രമൂലം ഗുരോർവാക്യം മോക്ഷമൂലം ഗുരോഃ കൃപാ ॥ 76 ॥

ഗുരുരാദിരനാദിശ്ച ഗുരുഃ പരമദൈവതം ।

ഗുരോഃ പരതരം നാസ്തി തസ്മൈ ശ്രീഗുരവേ നമഃ ॥ 77 ॥

സപ്തസാഗരപര്യന്ത തീർഥസ്നാനാദികം ഫലം ।

ഗുരോരംഘ്രിപയോബിന്ദുസഹസ്രാംശേ ന ദുർലഭം ॥ 78 ॥

ഹരൗ രുഷ്ടേ ഗുരുസ്ത്രാതാ ഗുരൗ രുഷ്ടേ ന കശ്ചന ।

തസ്മാത്സർവപ്രയത്നേന ശ്രീഗുരും ശരണം വ്രജേത് ॥ 79 ॥

ഗുരുരേവ ജഗത്സർവം ബ്രഹ്മവിഷ്ണുശിവാത്മകം ।

ഗുരോഃ പരതരം നാസ്തി തസ്മാത്സമ്പൂജയേദ്ഗുരും ॥ 80 ॥

ജ്ഞാനം വിജ്ഞാനസഹിതം ലഭ്യതേ ഗുരുഭക്തിതഃ ।

ഗുരോഃ പരതരം നാസ്തി ധ്യേയോഽസൗ ഗുരുമാർഗിഭിഃ ॥ 81 ॥

യസ്മാത്പരതരം നാസ്തി നേതി നേതീതി വൈ ശ്രുതിഃ ।

മനസാ വചസാ ചൈവ നിത്യമാരാധയേദ്ഗുരും ॥ 82 ॥

ഗുരോഃ കൃപാ പ്രസാദേന ബ്രഹ്മവിഷ്ണുസദാശിവാഃ ।

സമർഥാഃ പ്രഭവാദൗ ച കേവലം ഗുരുസേവയാ ॥ 83 ॥

ദേവകിന്നരഗന്ധർവാഃ പിതരോ യക്ഷചാരണാഃ ।

മുനയോഽപി ന ജാനന്തി ഗുരുശുശ്രൂഷണേ വിധിം ॥ 84 ॥

മഹാഹങ്കാരഗർവേണ തപോവിദ്യാബലാന്വിതാഃ ।

സംസാരകുഹരാവർതേ ഘടയന്ത്രേ യഥാ ഘടാഃ ॥ 85 ॥

ന മുക്താ ദേവഗന്ധർവാഃ പിതരോ യക്ഷകിന്നരാഃ ।

ഋഷയഃ സർവസിദ്ധാശ്ച ഗുരുസേവാ പരാങ്മുഖാഃ ॥ 86 ॥

ധ്യാനം ശൃണു മഹാദേവി സർവാനന്ദപ്രദായകം ।

സർവസൗഖ്യകരം നിത്യം ഭുക്തിമുക്തിവിധായകം ॥ 87 ॥

ശ്രീമത്പരബ്രഹ്മ ഗുരും സ്മരാമി

ശ്രീമത്പരബ്രഹ്മ ഗുരും വദാമി ।

ശ്രീമത്പരബ്രഹ്മ ഗുരും നമാമി

ശ്രീമത്പരബ്രഹ്മ ഗുരും ഭജാമി ॥ 88 ॥

ബ്രഹ്മാനന്ദം പരമസുഖദം കേവലം ജ്ഞാനമൂർതിം

ദ്വന്ദ്വാതീതം ഗഗനസദൃശം തത്ത്വമസ്യാദിലക്ഷ്യം ।

ഏകം നിത്യം വിമലമചലം സർവധീസാക്ഷിഭൂതം

ഭാവാതീതം ത്രിഗുണരഹിതം സദ്ഗുരും തം നമാമി ॥ 89 ॥

നിത്യം ശുദ്ധം നിരാഭാസം നിരാകാരം നിരഞ്ജനം ।

നിത്യബോധം ചിദാനന്ദം ഗുരും ബ്രഹ്മ നമാമ്യഹം ॥ 90 ॥

ഹൃദംബുജേ കർണികമധ്യസംസ്ഥേ

സിംഹാസനേ സംസ്ഥിതദിവ്യമൂർതിം ।

ധ്യായേദ്ഗുരും ചന്ദ്രകലാപ്രകാശം

ചിത്പുസ്തകാഭീഷ്ടവരം ദധാനം ॥ 91 ॥

ശ്വേതാംബരം ശ്വേതവിലേപപുഷ്പം

മുക്താവിഭൂഷം മുദിതം ദ്വിനേത്രം ।

വാമാങ്കപീഠസ്ഥിതദിവ്യശക്തിം

മന്ദസ്മിതം സാന്ദ്രകൃപാനിധാനം ॥ 92 ॥

ആനന്ദമാനന്ദകരം പ്രസന്നം

ജ്ഞാനസ്വരൂപം നിജബോധയുക്തം ।

യോഗീന്ദ്രമീഡ്യം ഭവരോഗവൈദ്യം

ശ്രീമദ്ഗുരും നിത്യമഹം നമാമി ॥ 93 ॥

യസ്മിൻസൃഷ്ടിസ്ഥിതിധ്വംസനിഗ്രഹാനുഗ്രഹാത്മകം ।

കൃത്യം പഞ്ചവിധം ശശ്വദ്ഭാസതേ തം നമാമ്യഹം ॥ 94 ॥

പ്രാതഃ ശിരസി ശുക്ലാബ്ജേ ദ്വിനേത്രം ദ്വിഭുജം ഗുരും ।

വരാഭയയുതം ശാന്തം സ്മരേത്തം നാമപൂർവകം ॥ 95 ॥

ന ഗുരോരധികം ന ഗുരോരധികം

ന ഗുരോരധികം ന ഗുരോരധികം ।

ശിവശാസനതഃ ശിവശാസനതഃ

ശിവശാസനതഃ ശിവശാസനതഃ ॥ 96 ॥

ഇദമേവ ശിവം ത്വിദമേവ ശിവം

ത്വിദമേവ ശിവം ത്വിദമേവ ശിവം ।

മമ ശാസനതോ മമ ശാസനതോ

മമ ശാസനതോ മമ ശാസനതഃ ॥ 97 ॥

ഏവംവിധം ഗുരും ധ്യാത്വാ ജ്ഞാനമുത്പദ്യതേ സ്വയം ।

തത്സദ്ഗുരുപ്രസാദേന മുക്തോഽഹമിതി ഭാവയേത് ॥ 98 ॥

ഗുരുദർശിതമാർഗേണ മനഃശുദ്ധിം തു കാരയേത് ।

അനിത്യം ഖണ്ഡയേത്സർവം യത്കിഞ്ചിദാത്മഗോചരം ॥ 99 ॥

ജ്ഞേയം സർവസ്വരൂപം ച ജ്ഞാനം ച മന ഉച്യതേ ।

ജ്ഞാനം ജ്ഞേയസമം കുര്യാൻ നാന്യഃ പന്ഥാ ദ്വിതീയകഃ ॥ 100 ॥

ഏവം ശ്രുത്വാ മഹാദേവി ഗുരുനിന്ദാം കരോതി യഃ ।

സ യാതി നരകം ഘോരം യാവച്ചന്ദ്രദിവാകരൗ ॥ 101 ॥

യാവത്കൽപാന്തകോ ദേഹസ്താവദേവ ഗുരും സ്മരേത് ।

ഗുരുലോപോ ന കർതവ്യഃ സ്വച്ഛന്ദോ യദി വാ ഭവേത് ॥ 102 ॥

ഹുങ്കാരേണ ന വക്തവ്യം പ്രാജ്ഞൈഃ ശിഷ്യൈഃ കഥഞ്ചന ।

ഗുരോരഗ്രേ ന വക്തവ്യമസത്യം ച കദാചന ॥ 103 ॥

ഗുരും ത്വങ്കൃത്യ ഹുങ്കൃത്യ ഗുരും നിർജിത്യ വാദതഃ ।

അരണ്യേ നിർജലേ ദേശേ സ ഭവേദ്ബ്രഹ്മരാക്ഷസഃ ॥ 104 ॥

മുനിഭിഃ പന്നഗൈർവാഽപി സുരൈർവാ ശാപിതോ യദി ।

കാലമൃത്യുഭയാദ്വാപി ഗുരൂ രക്ഷതി പാർവതി ॥ 105 ॥

അശക്താ ഹി സുരാദ്യാശ്ച അശക്താ മുനയസ്തഥാ ।

ഗുരുശാപേന തേ ശീഘ്രം ക്ഷയം യാന്തി ന സംശയഃ ॥ 106 ॥

മന്ത്രരാജമിദം ദേവി ഗുരുരിത്യക്ഷരദ്വയം ।

സ്മൃതിവേദാർഥവാക്യേന ഗുരുഃ സാക്ഷാത്പരം പദം ॥ 107 ॥

ശ്രുതിസ്മൃതീ അവിജ്ഞായ കേവലം ഗുരുസേവകാഃ ।

തേ വൈ സംന്യാസിനഃ പ്രോക്താ ഇതരേ വേഷധാരിണഃ ॥ 108 ॥

നിത്യം ബ്രഹ്മ നിരാകാരം നിർഗുണം ബോധയേത് പരം ।

സർവം ബ്രഹ്മ നിരാഭാസം ദീപോ ദീപാന്തരം യഥാ ॥ 109 ॥

ഗുരോഃ കൃപാപ്രസാദേന ആത്മാരാമം നിരീക്ഷയേത് ।

അനേന ഗുരുമാർഗേണ സ്വാത്മജ്ഞാനം പ്രവർതതേ ॥ 110 ॥

ആബ്രഹ്മ സ്തംബപര്യന്തം പരമാത്മസ്വരൂപകം ।

സ്ഥാവരം ജംഗമം ചൈവ പ്രണമാമി ജഗന്മയം ॥ 111 ॥

വന്ദേഽഹം സച്ചിദാനന്ദം ഭേദാതീതം സദാ ഗുരും ।

നിത്യം പൂർണം നിരാകാരം നിർഗുണം സ്വാത്മസംസ്ഥിതം ॥ 112 ॥

പരാത്പരതരം ധ്യേയം നിത്യമാനന്ദകാരകം ।

ഹൃദയാകാശമധ്യസ്ഥം ശുദ്ധസ്ഫടികസന്നിഭം ॥ 113 ॥

സ്ഫടികപ്രതിമാരൂപം ദൃശ്യതേ ദർപണേ യഥാ ।

തഥാത്മനി ചിദാകാരമാനന്ദം സോഽഹമിത്യുത ॥ 114 ॥

അംഗുഷ്ഠമാത്രപുരുഷം ധ്യായതശ്ചിന്മയം ഹൃദി ।

തത്ര സ്ഫുരതി ഭാവോ യഃ ശൃണു തം കഥയാമ്യഹം ॥ 115 ॥

അഗോചരം തഥാഽഗമ്യം നാമരൂപവിവർജിതം ।

നിഃശബ്ദം തദ്വിജാനീയാത് സ്വഭാവം ബ്രഹ്മ പാർവതി ॥ 116 ॥

യഥാ ഗന്ധഃ സ്വഭാവേന കർപൂരകുസുമാദിഷു ।

ശീതോഷ്ണാദി സ്വഭാവേന തഥാ ബ്രഹ്മ ച ശാശ്വതം ॥ 117 ॥

സ്വയം തഥാവിധോ ഭൂത്വാ സ്ഥാതവ്യം യത്രകുത്രചിത് ।

കീടഭ്രമരവത്തത്ര ധ്യാനം ഭവതി താദൃശം ॥ 118 ॥

ഗുരുധ്യാനം തഥാ കൃത്വാ സ്വയം ബ്രഹ്മമയോ ഭവേത് ।

പിണ്ഡേ പദേ തഥാ രൂപേ മുക്തോഽസൗ നാത്ര സംശയഃ ॥ 119 ॥

ശ്രീ പാർവത്യുവാച –

പിണ്ഡം കിം തു മഹാദേവ പദം കിം സമുദാഹൃതം ।

രൂപാതീതം ച രൂപം കിമേതദാഖ്യാഹി ശങ്കര ॥ 120 ॥

ശ്രീ മഹാദേവ ഉവാച –

പിണ്ഡം കുണ്ഡലിനീശക്തിഃ പദം ഹംസമുദാഹൃതം ।

രൂപം ബിന്ദുരിതി ജ്ഞേയം രൂപാതീതം നിരഞ്ജനം ॥ 121 ॥

പിണ്ഡേ മുക്താ പദേ മുക്താ രൂപേ മുക്താ വരാനനേ ।

രൂപാതീതേ തു യേ മുക്താസ്തേ മുക്താ നാത്ര സംശയഃ ॥ 122 ॥

സ്വയം സർവമയോ ഭൂത്വാ പരം തത്ത്വം വിലോകയേത് ।

പരാത്പരതരം നാന്യത് സർവമേതന്നിരാലയം ॥ 123 ॥

തസ്യാവലോകനം പ്രാപ്യ സർവസംഗവിവർജിതഃ ।

ഏകാകീ നിഃസ്പൃഹഃ ശാന്തസ്തിഷ്ഠാസേത്തത്പ്രസാദതഃ ॥ 124 ॥

ലബ്ധം വാഽഥ ന ലബ്ധം വാ സ്വൽപം വാ ബഹുലം തഥാ ।

നിഷ്കാമേനൈവ ഭോക്തവ്യം സദാ സന്തുഷ്ടചേതസാ ॥ 125 ॥

സർവജ്ഞപദമിത്യാഹുർദേഹീ സർവമയോ ബുധാഃ ।

സദാനന്ദഃ സദാ ശാന്തോ രമതേ യത്രകുത്രചിത് ॥ 126 ॥

യത്രൈവ തിഷ്ഠതേ സോഽപി സ ദേശഃ പുണ്യഭാജനം ।

മുക്തസ്യ ലക്ഷണം ദേവി തവാഗ്രേ കഥിതം മയാ ॥ 127 ॥

ഉപദേശസ്തഥാ ദേവി ഗുരുമാർഗേണ മുക്തിദഃ ।

ഗുരുഭക്തിസ്തഥാ ധ്യാനം സകലം തവ കീർതിതം ॥ 128 ॥

അനേന യദ്ഭവേത്കാര്യം തദ്വദാമി മഹാമതേ ।

ലോകോപകാരകം ദേവി ലൗകികം തു ന ഭാവയേത് ॥ 129 ॥

ലൗകികാത്കർമണോ യാന്തി ജ്ഞാനഹീനാ ഭവാർണവം ।

ജ്ഞാനീ തു ഭാവയേത്സർവം കർമ നിഷ്കർമ യത്കൃതം ॥ 130 ॥

ഇദം തു ഭക്തിഭാവേന പഠതേ ശൃണുതേ യദി ।

ലിഖിത്വാ തത്പ്രദാതവ്യം തത്സർവം സഫലം ഭവേത് ॥ 131 ॥

ഗുരുഗീതാത്മകം ദേവി ശുദ്ധതത്ത്വം മയോദിതം ।

ഭവവ്യാധിവിനാശാർഥം സ്വയമേവ ജപേത്സദാ ॥ 132 ॥

ഗുരുഗീതാക്ഷരൈകം തു മന്ത്രരാജമിമം ജപേത് ।

അന്യേ ച വിവിധാ മന്ത്രാഃ കലാം നാർഹന്തി ഷോഡശീം ॥ 133 ॥

അനന്തഫലമാപ്നോതി ഗുരുഗീതാജപേന തു ।

സർവപാപപ്രശമനം സർവദാരിദ്ര്യനാശനം ॥ 134 ॥

കാലമൃത്യുഭയഹരം സർവസങ്കടനാശനം ।

യക്ഷരാക്ഷസഭൂതാനാം ചോരവ്യാഘ്രഭയാപഹം ॥ 135 ॥

മഹാവ്യാധിഹരം സർവം വിഭൂതിസിദ്ധിദം ഭവേത് ।

അഥവാ മോഹനം വശ്യം സ്വയമേവ ജപേത്സദാ ॥ 136 ॥

വസ്ത്രാസനേ ച ദാരിദ്ര്യം പാഷാണേ രോഗസംഭവഃ ।

മോദിന്യാം ദുഃഖമാപ്നോതി കാഷ്ഠേ ഭവതി നിഷ്ഫലം ॥ 137 ॥

കൃഷ്ണാജിനേ ജ്ഞാനസിദ്ധിർമോക്ഷശ്രീ വ്യാഘ്രചർമണി ।

കുശാസനേ ജ്ഞാനസിദ്ധിഃ സർവസിദ്ധിസ്തു കംബലേ ॥ 138 ॥

കുശൈർവാ ദൂർവയാ ദേവി ആസനേ ശുഭ്രകംബലേ ।

ഉപവിശ്യ തതോ ദേവി ജപേദേകാഗ്രമാനസഃ ॥ 139 ॥

ധ്യേയം ശുക്ലം ച ശാന്ത്യർഥം വശ്യേ രക്താസനം പ്രിയേ ।

അഭിചാരേ കൃഷ്ണവർണം പീതവർണം ധനാഗമേ ॥ 140 ॥

ഉത്തരേ ശാന്തികാമസ്തു വശ്യേ പൂർവമുഖോ ജപേത് ।

ദക്ഷിണേ മാരണം പ്രോക്തം പശ്ചിമേ ച ധനാഗമഃ ॥ 141 ॥

മോഹനം സർവഭൂതാനാം ബന്ധമോക്ഷകരം ഭവേത് ।

ദേവരാജപ്രിയകരം സർവലോകവശം ഭവേത് ॥ 142 ॥

സർവേഷാം സ്തംഭനകരം ഗുണാനാം ച വിവർധനം ।

ദുഷ്കർമനാശനം ചൈവ സുകർമസിദ്ധിദം ഭവേത് ॥ 143 ॥

അസിദ്ധം സാധയേത്കാര്യം നവഗ്രഹഭയാപഹം ।

ദുഃസ്വപ്നനാശനം ചൈവ സുസ്വപ്നഫലദായകം ॥ 144 ॥

സർവശാന്തികരം നിത്യം തഥാ വന്ധ്യാസുപുത്രദം ।

അവൈധവ്യകരം സ്ത്രീണാം സൗഭാഗ്യദായകം സദാ ॥ 145 ॥

ആയുരാരോഗ്യമൈശ്വര്യപുത്രപൗത്രപ്രവർധനം ।

അകാമതഃ സ്ത്രീ വിധവാ ജപാന്മോക്ഷമവാപ്നുയാത് ॥ 146 ॥

അവൈധവ്യം സകാമാ തു ലഭതേ ചാന്യജന്മനി ।

സർവദുഃഖഭയം വിഘ്നം നാശയേച്ഛാപഹാരകം ॥ 147 ॥

സർവബാധാപ്രശമനം ധർമാർഥകാമമോക്ഷദം ।

യം യം ചിന്തയതേ കാമം തം തം പ്രാപ്നോതി നിശ്ചിതം ॥ 148 ॥

കാമിതസ്യ കാമധേനുഃ കൽപനാകൽപപാദപഃ ।

ചിന്താമണിശ്ചിന്തിതസ്യ സർവമംഗലകാരകം ॥ 149 ॥

മോക്ഷഹേതുർജപേന്നിത്യം മോക്ഷശ്രിയമവാപ്നുയാത് ।

ഭോഗകാമോ ജപേദ്യോ വൈ തസ്യ കാമഫലപ്രദം ॥ 150 ॥

ജപേച്ഛാക്തശ്ച സൗരശ്ച ഗാണപത്യശ്ച വൈഷ്ണവഃ ।

ശൈവശ്ച സിദ്ധിദം ദേവി സത്യം സത്യം ന സംശയഃ ॥ 151 ॥

അഥ കാമ്യജപേ സ്ഥാനം കഥയാമി വരാനനേ ।

സാഗരേ വാ സരിത്തീരേഽഥവാ ഹരിഹരാലയേ ॥ 152 ॥

ശക്തിദേവാലയേ ഗോഷ്ഠേ സർവദേവാലയേ ശുഭേ ।

വടേ ച ധാത്രീമൂലേ വാ മഠേ വൃന്ദാവനേ തഥാ ॥ 153 ॥

പവിത്രേ നിർമലേ സ്ഥാനേ നിത്യാനുഷ്ഠാനതോഽപി വാ ।

നിർവേദനേന മൗനേന ജപമേതം സമാചരേത് ॥ 154 ॥

ശ്മശാനേ ഭയഭൂമൗ തു വടമൂലാന്തികേ തഥാ ।

സിദ്ധ്യന്തി ധൗത്തരേ മൂലേ ചൂതവൃക്ഷസ്യ സന്നിധൗ ॥ 155 ॥

ഗുരുപുത്രോ വരം മൂർഖസ്തസ്യ സിദ്ധ്യന്തി നാന്യഥാ ।

ശുഭകർമാണി സർവാണി ദീക്ഷാവ്രതതപാംസി ച ॥ 156 ॥

സംസാരമലനാശാർഥം ഭവപാശനിവൃത്തയേ ।

ഗുരുഗീതാംഭസി സ്നാനം തത്ത്വജ്ഞഃ കുരുതേ സദാ ॥ 157 ॥

സ ഏവ ച ഗുരുഃ സാക്ഷാത് സദാ സദ്ബ്രഹ്മവിത്തമഃ ।

തസ്യ സ്ഥാനാനി സർവാണി പവിത്രാണി ന സംശയഃ ॥ 158 ॥

സർവശുദ്ധഃ പവിത്രോഽസൗ സ്വഭാവാദ്യത്ര തിഷ്ഠതി ।

തത്ര ദേവഗണാഃ സർവേ ക്ഷേത്രേ പീഠേ വസന്തി ഹി ॥ 159 ॥

ആസനസ്ഥഃ ശയാനോ വാ ഗച്ഛംസ്തിഷ്ഠൻ വദന്നപി ।

അശ്വാരൂഢോ ഗജാരൂഢഃ സുപ്തോ വാ ജാഗൃതോഽപി വാ ॥ 160 ॥

ശുചിഷ്മാംശ്ച സദാ ജ്ഞാനീ ഗുരുഗീതാജപേന തു ।

തസ്യ ദർശനമാത്രേണ പുനർജന്മ ന വിദ്യതേ ॥ 161 ॥

സമുദ്രേ ച യഥാ തോയം ക്ഷീരേ ക്ഷീരം ഘൃതേ ഘൃതം ।

ഭിന്നേ കുംഭേ യഥാകാശസ്തഥാത്മാ പരമാത്മനി ॥ 162 ॥

തഥൈവ ജ്ഞാനീ ജീവാത്മാ പരമാത്മനി ലീയതേ ।

ഐക്യേന രമതേ ജ്ഞാനീ യത്ര തത്ര ദിവാനിശം ॥ 163 ॥

ഏവംവിധോ മഹാമുക്തഃ സർവദാ വർതതേ ബുധഃ ।

തസ്യ സർവപ്രയത്നേന ഭാവഭക്തിം കരോതി യഃ ॥ 164 ॥

സർവസന്ദേഹരഹിതോ മുക്തോ ഭവതി പാർവതി ।

ഭുക്തിമുക്തിദ്വയം തസ്യ ജിഹ്വാഗ്രേ ച സരസ്വതീ ॥ 165 ॥

അനേന പ്രാണിനഃ സർവേ ഗുരുഗീതാ ജപേന തു ।

സർവസിദ്ധിം പ്രാപ്നുവന്തി ഭുക്തിം മുക്തിം ന സംശയഃ ॥ 166 ॥

സത്യം സത്യം പുനഃ സത്യം ധർമ്യം സാംഖ്യം മയോദിതം ।

ഗുരുഗീതാസമം നാസ്തി സത്യം സത്യം വരാനനേ ॥ 167 ॥

ഏകോ ദേവ ഏകധർമ ഏകനിഷ്ഠാ പരം തപഃ ।

ഗുരോഃ പരതരം നാന്യന്നാസ്തി തത്ത്വം ഗുരോഃ പരം ॥ 168 ॥

മാതാ ധന്യാ പിതാ ധന്യോ ധന്യോ വംശഃ കുലം തഥാ ।

ധന്യാ ച വസുധാ ദേവി ഗുരുഭക്തിഃ സുദുർലഭാ ॥ 169 ॥

ശരീരമിന്ദ്രിയം പ്രാണാശ്ചാർഥഃ സ്വജനബാന്ധവാഃ ।

മാതാ പിതാ കുലം ദേവി ഗുരുരേവ ന സംശയഃ ॥ 170 ॥

ആകൽപജന്മനാ കോട്യാ ജപവ്രതതപഃക്രിയാഃ ।

തത്സർവം സഫലം ദേവി ഗുരുസന്തോഷമാത്രതഃ ॥ 171 ॥

വിദ്യാതപോബലേനൈവ മന്ദഭാഗ്യാശ്ച യേ നരാഃ ।

ഗുരുസേവാം ന കുർവന്തി സത്യം സത്യം വരാനനേ ॥ 172 ॥

ബ്രഹ്മവിഷ്ണുമഹേശാശ്ച ദേവർഷിപിതൃകിന്നരാഃ ।

സിദ്ധചാരണയക്ഷാശ്ച അന്യേഽപി മുനയോ ജനാഃ ॥ 173 ॥

ഗുരുഭാവഃ പരം തീർഥമന്യതീർഥം നിരർഥകം ।

സർവതീർഥാശ്രയം ദേവി പാദാംഗുഷ്ഠം ച വർതതേ ॥ 174 ॥

ജപേന ജയമാപ്നോതി ചാനന്തഫലമാപ്നുയാത് ।

ഹീനകർമ ത്യജൻസർവം സ്ഥാനാനി ചാധമാനി ച ॥ 175 ॥

ജപം ഹീനാസനം കുർവൻഹീനകർമഫലപ്രദം ।

ഗുരുഗീതാം പ്രയാണേ വാ സംഗ്രാമേ രിപുസങ്കടേ ॥ 176 ॥

ജപഞ്ജയമവാപ്നോതി മരണേ മുക്തിദായകം ।

സർവകർമ ച സർവത്ര ഗുരുപുത്രസ്യ സിദ്ധ്യതി ॥ 177 ॥

ഇദം രഹസ്യം നോ വാച്യം തവാഗ്രേ കഥിതം മയാ ।

സുഗോപ്യം ച പ്രയത്നേന മമ ത്വം ച പ്രിയാ ത്വിതി ॥ 178 ॥

സ്വാമി മുഖ്യഗണേശാദി വിഷ്ണ്വാദീനാം ച പാർവതി ।

മനസാപി ന വക്തവ്യം സത്യം സത്യം വദാമ്യഹം ॥ 179 ॥

അതീവപക്വചിത്തായ ശ്രദ്ധാഭക്തിയുതായ ച ।

പ്രവക്തവ്യമിദം ദേവി മമാത്മാഽസി സദാ പ്രിയേ ॥ 180 ॥

അഭക്തേ വഞ്ചകേ ധൂർതേ പാഖണ്ഡേ നാസ്തികേ നരേ ।

മനസാപി ന വക്തവ്യാ ഗുരുഗീതാ കദാചന ॥ 181 ॥

സംസാരസാഗരസമുദ്ധരണൈകമന്ത്രം

ബ്രഹ്മാദിദേവമുനിപൂജിതസിദ്ധമന്ത്രം ॥

ദാരിദ്ര്യദുഃഖഭവരോഗവിനാശമന്ത്രം

വന്ദേ മഹാഭയഹരം ഗുരുരാജമന്ത്രം ॥ 182 ॥

॥ ഇതി ശ്രീസ്കന്ദപുരാണേ ഉത്തരഖണ്ഡേ ഈശ്വരപാർവതീ സംവാദേ ഗുരുഗീതാ സമാപ്ത ॥

॥ ശ്രീഗുരു ദത്താത്രേയാർപണമസ്തു ॥

സമ്പാദകൻ

സ്വാമി സാധു കൃഷ്ണാനന്ദ സരസ്വതി

മഠാധിപതി

കൃഷ്ണാനന്ദ സിദ്ധ വേദ ആശ്രമം

പെരിയമ്പലം

തൃശ്ശൂർ ജില്ല

90 61 97 12 27